Կարտինալ Թուրքսոն 5-9 Օգոստոս Ճաբոնի Մէջ Ոգեկոչելու` Հիրոշիմայի եւ Նակազաքիի Զոհերը։
Օգոստոս 5-9 Արդարութիւն եւ խաղաղութիւն քահանայապետական խորհուրդի նախագահ` կարտինալ
Թուրքսոն Ճաբոն կը մեկնի ոգեկոչելու Հիրոշիմայի եւ Նակազաքիի, 1945-ի 6 եւ 9 օգոստոսի,
միջուկային ռմբակոծումներու զոհերը։
Այս առթիւ Ճաբոնի եպիսկոպոսները նախաձեռնած
են նաեւ ''խաղաղութեան համար 10 օր'' վերտառութեամբ ծրագիր մը ի յիշատակ միջուկային
ռմբակոծումներու զոհերուն։
Կարտինալ Թուրքսոնի այցելութեան յայտագիրը 5 օգոստոսին
կը նախատեսէ հոգեհանգստեան ս. պատարագ Հիրոշիմայի Աթոռանիստ եկեղեցւոյ մէջ։ Յաջորդ օրը
Ան կը մասնակցի միջկրօնական հանդիպումի մը` պուտտայականներու, շինդոյիսդներու ու բողոքականներու
հետ։ Այս առթիւ կարտինալը ճառ մը պիտի արտասանէ ''համաշխարհային խաղաղութեան կերտումը
փոխադարձ համագործակցութեամբ'' նիւթին մասին։
Չորեքշաբթի 7 օգոստոսին Ծիրանաւորը
Նակազաքիի մէջ կը մասնակցի ընթրիքի մը կազմակերպուած` համաշխարհային խաղաղութեան երկխօսութեան
միջկրօնական Կեդրոնի կողմէ։
Հինգշաբթի 8 օգոստոսին, Կարտինալ Թուրքսոն կը մասնակցի
միջկրօնական արարողութեան մը որուն ընթացքին աղօթք մը կը կատարէ բոլոր զոհերուն համար
եւ մասնաւորապէս անոնց համար որոնք տակաւին կը տառապին միջուկային շողարձակումի հետեւանքներէն։
Հուսկ 9 օգոստոսին. միշտ Նակազաքիի մէջ Կարտինալ Թուրքսոն աշխարհի խաղաղութեան
համար նուիրուած սուրբ պատարագի արարողութեամբ կ՛եզրափակէ ճաբոնի իր ճամբորդութիւնը
եւ կը վերադառնայ հռոմ։